१६ फागुन, हेटौंडा
जंगली हात्तीको आक्रमणबाट मुत्यु भएका व्यक्तिको परिवारलाई बागमती प्रदेश सरकारले प्रतिपरिवार एक लाख रुपैयाँ क्षतिपूर्ति दिनेभएको छ ।
प्रदेश सरकारको आज मंगलबार बिहान बसेको मन्त्रिपरिषद् बैठकले गएको साता हात्तीको आक्रमणबाट मृत्यु भएका मकवानपुरका २ जना र सिन्धुलीका १ जनाका परिवारलाई प्रतिपरिवार एक-एक लाख रुपैयाँका दरले क्षतिपूर्ति दिने निर्णय गरेको हो ।
गएको साता जंगली हात्तीको आक्रमणबाट मकवानपुर मनहरी–४ की ६४ वर्षीया राधा अधिकारी, बकैया–५ का सन्तलाल माझी र सिन्धुली कमलामाई नगरपालिका–१३ रानीबासका ४१ वर्षीय डण्डपाणि पौडेलको मृत्यु भएको थियो ।
बैठकले प्रदेश सुशासन केन्द्रका निर्देशक बिमल पोखरेलको राजीनामा स्विकृत गरेको छ भने कृषि मन्त्रालय मार्फत् स्थानीय तहमा कार्यान्वयन हुने गरी विभिन्न शिर्षकमा ३ करोड रुपैयाँ बजेट पठाउने निर्णय भएको मन्त्री थपलियाले जानकारी दिए ।
