नारायणगढ
कम्प्युटर एसोसिएसन नेपाल महासंघ (क्यान) जिल्ला शाखा चितवनले भित्तेपात्रो र टेबुलपात्रो विमोचन गरेको छ । क्यान महासंघका केन्द्रीय सदस्य भानु शर्मा, बागमती प्रदेश उपाध्यक्ष सन्तोषजनक भुसाललगायतको उपस्थितिमा भित्तेपात्रो र टेबुलपात्रो एकसाथ विमोचन गरिएको हो ।
विगतका वर्षहरूमा जस्तै यसवर्ष पनि वार्षिक कार्यक्रम नै बनाएर क्यालेण्डर प्रकाशन गरिएको महासंघका चितवन जिल्ला अध्यक्ष टेकलाल भुसालले जानकारी दिए । कार्यक्रममा नयाँ वर्ष २०८० सालको शुभकामनासमेत आदानप्रदान गरेको थियो ।
कार्यक्रमका प्रमुख अतिथि भानु शर्माले क्यान चितवनको सक्रियता बढ्दै जाँदा सूचना प्रविधिसम्बन्धी व्यवसाय गर्नेहरूको उपस्थिति पनि बढ्दै गएको बताए । उपाध्यक्ष दिलीप तामाङले स्वागत मन्तव्य दिएको कार्यक्रममा क्यालेण्डर प्रकाशन समितिका संयोजक विनोद अनुजलगायतले मन्तव्य दिएका थिए ।
क्यानले भित्तेपात्रो विगतदेखि नै प्रकाशन गर्दै आए पनि टेबुलपात्रो भने पहिलोपटक प्रकाशन गरेको हो । कार्यक्रममा क्यान चितवनका पूर्वअध्यक्ष माधवप्रसाद पौडेलको समेत उपस्थिति थियो ।
