कावासोती, असार १६-
पूर्वी नवलपरासीको सदरमुकाम कावासोतीमा पानीको निकास नहुँदा महेन्द्र राजमार्ग जलाम्मे भएको छ । राजमार्गदेखि उत्तरतर्फबाट आएको पानीले निकास नपाउँदा राजमार्गसहित बजार क्षेत्र डुबेको हो ।
‘कावासोती बजार डुब्नु नयाँ कुरा त हैन, हरेक वर्षायाममा यस्तै हो, कसैको चासो छैन,’ स्थानीय विष्णु पाण्डे भन्छन्, ‘ढल निकासको व्यवस्था नहुँदा पानी परेका बेला राजमार्ग नै खोलो बन्छ ।’ सभापतिचोकदेखि पूर्व महेन्द्र राजमार्गमा खाल्डोको सूचना दिन स्थानीयले राजमार्गमै ढुंगा राखेर रातो कपडा बाँधेका छन् ।
