सरकारसँग लम्पी स्किन रोगको महामारीमा क्षति भएका पशुचौपायहरुको उचित क्षतिपूर्तिसहितको ६ बूँदे माग राख्दै आएका पीडित किसानहरुले धर्ना समेत दिन थालेका छन् ।
बुधबार ललितपुरको हरिहरभवनस्थित पशु सेवा विभाग परिसरमा पुगेर उनीहरुले आफूहरुको माग सम्बोधन गर्न दवाव स्वरुप एक घण्टा धर्ना दिएका हुन्। यो रोग तत्काल नियन्त्रण गर्न र पीडित किसानलाई तत्काल राहतको व्यवस्था गर्न आफूहरुले सरकारलाई बाध्य बनाउने गरी आन्दोलनको कार्यक्रम सुरु गर्नु परेको अखिल नेपाल किसान महासंघकी उपमहासचिव सरिता भुसालले बताए ।
उनले पशुपालक किसानहरुले लिएको कर्जा पनि सरकारले मिनाहा गर्नुपर्ने बताए । पीडित किसानहरुले पशु आफूहरुका लागि विमाको भुक्तानी गर्न पनि सरकारले ढिलाई गर्न नहुने बताएका छन्।
‘ग्रामिण क्षेत्रका किसानहरु यतिबेला पूरै आहात भएका छन् । ७० प्रतिशतभन्दा बढी पशु चौपायहरुलाई चाँही लम्पीस्किनको कारण मरिसकेको छ, ‘ प्याकुरेलले भने, ‘ त्यसका निम्ति पशुको विमा पनि क्लेम गर्न नसक्ने अवस्था देखिएको छ । र, पशु चौपायहरुको विमाको पनि हामीले क्लेम गरिराखेका छौं । छिट्टै यो महामारी रोग नियन्त्रणका निम्ति भ्याक्सिनको माग हामीले गरिराखेका छौं।’
लम्पी स्किन महामारीका कारण विस्थापित किसानहरुको पुर्नस्थापना र उनीहरुका लागि विमाको भुक्तानी गर्न पनि सरकारसँग माग गरिएको अखिल नेपाल किसान महासंघ, काठमाडौंका इन्चार्ज पुस्कर प्याकुरेलले बताए ।
उनले सो रोग नियन्त्रणका लागि पर्याप्त भ्याक्सिनको व्यवस्था मिलाउन पनि सरकारलाई सचेत गराए ।
‘पशुको औषधि उपचारका कुरा, विमाका कुरा र पशुपालक किसानहरुको विस्थापित हुने अवस्था छ । त्यसलाई पनि निरुपण गर्ने हिसावले राज्यले सोचोस भन्ने ढंगले हामीले यो महामारीविरुद्ध किसान सञ्जालको आयोजनामा हामीले धर्ना कार्यक्रम राखेका हौं ।’ उनले भने ।
रष्ट्रिय किसान सञ्जालको नेतृत्वमा आह्वान गरिएको धर्नामा लम्पी स्किन रोगको महामारी नियन्त्रण गरी पीडित किसानलाई राहतको घोषणा गर, लम्पी स्किन रोगको महामारीबाट मरेका पशुहरुको वास्तविक लागत संकलन गरियोस्, पशुहरुमा लागेको लम्पी स्किन रोगको महामारी नियन्त्रणका लागि पर्याप्त भ्याक्सिनको व्यवस्था गरियोस्, महामारीबाट क्षति भएका पशुहरुको किसानलाई राहत र क्षतिपूर्ति दिईयोस्, लम्पी स्किन रोगको महामारीबाट मरेका पशुहरुको वास्तविक लागत संकलन गरियोस् भन्ने लेखिएको प्ले कार्डहरु पनि प्रर्दशन गरिएको थियो।
