विवादित अभिब्यक्ति दिने अधिबक्ता भगवती पाण्डे र गत साउन १७ गते टेकु प्रहरी परिसरमा घटेको घटनाका दोषी प्रहरीलाई कारबाहीको माग गर्दै चितवनका तामाङ तथा मगर समुदायले ज्ञापन पत्र बुझाएका छन । सोमबार बिरोध प्रदर्शनसहित प्रमुख जिल्ला अधिकारीमार्फत गृहमन्त्रीलाई सम्बोधन गरि ज्ञापन पत्र बुझाइएको हो ।
ज्ञापनपत्रमा तामाङ तथा मगर समुदायलाई अपराधीकरण गर्दै अभिब्यक्ति दिने पाण्डेलाई हदैसम्मको कारबाही गरिनुपर्ने, साउन १७ गते टेकु प्रहरी परिसरमा अभियान्ताहरुलाई अमानवीय यातना दिने दोषी प्रहरीमाथि कारबाहि गरिनुपर्ने र घाइते भएका दर्जनौ अभियान्ताहरुको स्वास्थ्य उपचार सरकारले निशुल्क गराउनुपर्ने माग गरिएको छ ।
ज्ञापनपत्र बुझाउँदै नेपाल तामाङ घेदुङका जिल्ला अध्यक्ष बाबुलाल थिङले संघर्षका कार्यक्रम नरोकिने बताए । उनले पाण्डे र प्रहरीलाई कारबाहिको दायरामा नल्याए थप आन्दोलनका कार्यक्रमहरु सार्वजनिक गर्ने बताए ।
सो क्रममा पुर्वमन्त्री तथा लोकतान्त्रिक तामाङ संघका केन्द्रिय अध्यक्ष दावा लामाले पाण्डेलाई कारबाहीको माग गर्दै शान्तिपुर्ण प्रदर्शनमा उत्रिएकाहरुलाई प्रहरीले निर्घात कुटपिट गरिनु गणतन्त्रमाथीकै उपहास भएको बताए । उनले पाण्डे र याताना दिने प्रहरीलाई समेत तत्काल कारबाहीको दायरामा ल्याउन माग गरे ।
ज्ञापन पत्र बुझाउन घेदुङ तथा मगर संघका नेताहरुसहित कलाकार, अभियान्तालगायत सयौँको संख्यामा उपस्थित भएका थिए । उनीहरुले पारस बसपार्क हुदैँ जिल्ला प्रसाशन कार्यालयको मुलगेटमा पुगेर केहिबेर नाराबाजीसमेत गरे ।
प्रमुख जिल्ला अधिकारी सुरेन्द्र पौडेलले ज्ञापनपत्र बुझ्दै तत्काल गृहमन्त्रीसमक्ष पुर्याइने बताए । माग का बिषयमा सरकार गम्भीर रहेको सन्देश उनले दिए ।
