साउन ३२
अहिलेका युवा पुस्ताहरु धेरैको चाहना विदेशिने हुन्छ तर अपवाद कालिका नगरपालिका–१ लंकालाइनकी एन्जिला तामाङको इच्छा अरु युवाहरुको भन्दा फरक छ । भरतपुरको बोस्टन इन्टरनेशनल कलेजमा बीबीए आठौं सेमेस्टरमा अध्ययनरत एन्जिलाको चाहना भने देशभित्र नै केही गर्ने छ । जसको फलस्वरुप उनले साथीलाई लगानीको लागि प्रोत्साहित गर्दै लंकालाइनमा झण्डै एक करोड ३० लाख रुपैयाँको लगानीमा फिटनेस क्लब सञ्चालन गरेकी छन् ।
बीबीए आठौं समेस्टरको परीक्षा सकेर साथीहरुसँग नारायणगढमा चलचित्र हेर्न जाँदै गरेकी एन्जिलाले नारायणी अनलाइनलाई भनिन्, ‘ मेरो बीबीए तहको परीक्षा सकिएको छ । अब क्लबलाई पूरा समय दिएर व्यवस्थित गर्ने सोच बनाएको छु । ’ उनी कलेज पढ्न आउँदा बेलुका मात्र क्लबमा बस्ने गर्थिन् । बुबा देवबहादुर तामाङ, आमा हेलीमाया तामाङ र पोर्चुगलमा रहेका दाजुको सहयोगमा उनी विद्यार्थी जीवनमा नै व्यवसायिक यात्रामा अगाडि बढिन् । उनले आफूलाई परिवार र साथीहरुको पूर्ण सहयोग रहेको जानकारी दिइन् ।
सुरुमा पदमपुरको गाउँघरमा फिटनेस क्लब चल्दैन भनेर धेरैले सल्लाह दिने गरे पनि उनले कसैको कुरा नसुनी गाउँमा पनि चलाएर नै छाड्ने अठोट लिएर अगाडि बढिन् । एन्जिलाले भनिन्, ‘सानै देखि मेरो फिटनेस व्यवसाय गर्ने रहरले नै व्यवसायमा लाग्न प्रेरित ग¥यो । गाउँबाट सुरु गरेको मेरो व्यवसायलाई बिस्तारै शहरतिर बिस्तार गर्ने सोच बनाएको छु ।’ अहिले उनले दुई जनालाई रोजगारी दिएकी छन् । जसमा एक जना कार्यालय सहयोगी र एक जना सफाई गर्ने कर्मचारी छन् । अन्य अभ्यासहरु थपिएपछि अझ बढीले रोजगारी पाउने उनको अपेक्षा छ ।
कालिका नगरपालिका–१ का वडा सदस्य जीवन लामाले एनजी फिटनेस क्लबले निकै राम्रो व्यापार गरिरहेको नारायणी अनलाइनलाई बताए । अहिले धेरै मानिसहरुले शारीरिक श्रम नगर्ने प्रवृत्ति बढ्दै गएकोले पनि क्लबतिर आकर्षण बढेको विचार राखे । उनले भने, ‘ कलेज पढ्दै गरेकी एक विद्यार्थीले सुरु गरेको व्यवसायले निकै राम्रो गति लिँदै छ । यस क्षेत्रमा अन्य क्लबहरु नभएकोले पनि यसको व्यापार भविष्यमा अझै बढ्दै जाने अपेक्षा गरेको छु ।’
