नेकपा एमालेका नेता डा. भीम रावलले नेपालको संस्कृति भनेको देशका लागि मुटु कलेजो भएको बताउनुभएको छ । बिहीवार काठमाण्डाैमा गौरा पर्वको अवसरमा आयोजित कार्यक्रमलाई सम्बोधन गर्दै नेता रावलले यस्तो बताउनुभएको हो । उहाँले सुनको भारी सुटुक्क नपसोस्, गुणकारी शासन बनोस्, जग्गा खाने शरणार्थी काण्डहरूले देशकै फजिती नहोस् लगायतका कवितांशहरूबाट सरकारको व्यङ्ग्य गर्नुभयो ।
उहाँले भन्नुभयो, ‘सुनको भारी सुटुक्क नपसोस्, गुणकारी शासन बनोस्, जग्गा खाने शरणार्थी काण्डहरूले देशकै फजिती नहोस् । आफ्नै भाका लय र लहरले सङ्गीत मिठो बनोस् । कति समृद्ध, सुसंस्कृत देश छ नेपाल संसार सधैँ भनोस् । भारी भ्रष्ट मति, गति र खतिका मिल्काइदेउन् सबै । हे गौरा यो पवित्र भूमिमा नहोस् अनिष्ठ कवै । हाम्रा भाषा, संस्कृति, ऋति, रिवाज जसरी हाम्रा देशका मुटु कलेजा हुन् । देशको संस्कृति त्यस्तै हो । यदि कुनै देशका नागरिकलाई खत्तम पार्नु छ, त्यो देशको एकता सिध्याउनु छ, त्यो देशको स्वाभिमानलाई समाप्त गर्नु छ भने त्यो देशका गौरालाई समाप्त गर्नुपर्छ ।’
नेता रावलले आफू गृहमन्त्री हुँदा गौरा पर्वमा बिदा दिएको तर अहिले किन काटिएको भन्दै प्रश्न गर्नुभयो ।
