चितवन,पुस १
चितवनमा स्ट्रबेरीको अनुसन्धानपछि व्यवसायीक खेती विस्तार गरिएको छ । सप्तरी राजविराजका शशन देवकोटाको टिमले भरतपुर महानगरपालिका–५ समिचोकमा गरेको स्ट्रबेरीको परीक्षण खेती सफल भएपछि खेती विस्तार गरिएको हो । शशनसहित आठ जनाले स्ट्रबेरीको उत्पादनमाथि अनुसन्धान समेत गरिरहेको छ । उहाँको टिममा रहेका आठ जनामध्ये पाँच जनाले कृषि नै पढेका हुन् । नेपाल एग्रोभाइन प्रालि मार्फत अमेरिकामा विकसित जातहरु इजिप्टबाट ल्याएर यहाँ लगाइएको छ । पीएचडी अध्ययन देवकोटा खेतीबाट बचेको समयलाई कृषिका विद्यार्थीहरुलाई ज्ञान बाड्न व्यस्त रहेको बताउनुहुन्छ । ‘तराइँमा स्ट्रबेरी खेती सम्भव हुँदैन भन्ने सोच परिवर्तन गर्न हामीले चितवनमा स्ट्रबेरी खेती सुरु गरेका हौँ,उहाँले भन्नुभयो, राम्रो फलेको छ । हाम्रो टिम सन्तुष्ट छ ।’ उहाँले उत्पादन राम्रो भएका कारण क्षेत्र बढाएर एक बिघामा स्ट्रबेरी खेती गरेको बताउनुभयो । छुट्टै आठ कठ्ठामा भने अनुसन्धान भइरहेको छ ।
स्ट्रबेरी माटोको ड्याङ बनाएर रोप्ने गरिन्छ । ड्याङको चौडाइ ७० देखि ९० सेन्टिमिटरसम्मको हुन्छ । बिरुवाहरूलाई ड्याङमा ३० देखि ३५ सेन्टिमिटरको अन्तर बनाएर रोप्नुपर्ने उहाँ बताउनुहुन्छ । दुई ड्याङ बीचको दुरी कम्तिमा ४५ सेन्टिमिटर कायम गर्नुपर्छ । ‘दोमट माटोमा स्ट्रबेरीको खेती राम्रो हुन्छ’, उहाँ भन्नुहुन्छ,‘बिरुवा रोपेपछि नियमित रूपमा गोडमेल गर्नुपर्छ, बिरुवामा प्लाष्टिकको मल्च बनाएर सिँचाइ गरिन्छ ।’ उहाँका अनुसार जाडोयाममा माटोमा चिस्यान रहिरहने भएकाले फल गुलियो हुन्छ ।
