भरतपुर
नेपाल पशुपन्छी औषधी व्यवसायी संघको १४औँ राष्ट्रिय महाधिवेशन तथा ३३औँ वार्षिक साधारण सभा चितवनमा हुने भएको छ । पुस २४ र २५ गते हुने अधिवेशनको भरतपुर महानगरपालिका प्रमुख रेनु दाहालले उद्घाटन गर्ने कार्यक्रम छ ।
महाधिवेशनमा सात प्रदेश र २२ वटा शाखाबाट महाधिवेशन प्रतिनिधि, कम्पनी प्रतिनिधि, परिवेक्षक, संघसंस्था प्रतिनिधि एवम् नियमनकारी निकायका प्रतिनिधि गरी एक हजार जना सहभागी हुने छन् । महाधिवेशनमा भने ४८१ जना महाधिवेशन प्रतिनिधि सहभागी हुने नेपाल पशुपन्छी औषधी व्यवसायी संघका अध्यक्ष पूर्णचन्द्र सापकोटाले बताए ।
महाधिवेशनबाट एक अध्यक्ष, तीन उपाध्यक्ष, एक महासचिव, एक सचिव, एक कोषाध्यक्ष, एक महिला सदस्य, चार खुल्ला सदस्य, सातै प्रदेशबाट एक/एक जना सदस्य, मनोनित एक जना सदस्य र निवर्तमान अध्यक्ष पदेन रहने गरी २१ सदस्यिय नयाँ कार्यसमिति दुई वर्षे कार्यकालको लागि निर्वाचित हुने छ ।
नेपालमा करिब २० वटा कम्पनीले भेटेरीनरी औषधी, भ्याक्सिन र फिड सप्लिमेन्टहरु उत्पादन तथा विक्री वितरण गर्दै आएका छन् । करिब १४० को हाराहारीमा पैठारीकर्ताले औषधी भ्याक्सिन तथा फिड सप्लिमेन्ट्सहरु पैठारी गरी विक्री गर्दै आएका छन् । भेटेरीनरी औषधी फिड सप्लिमेन्ट तथा औषधीजन्य पदार्थहरुको बजार बार्षिक १३ अर्ब रुपैयाँ पुगेको नेपाल पशुपन्छी औषधी व्यवसायी संघका महासचिव नारायण बहादुर भुजेलले बताए ।
पशुपन्छी औषधी, भ्याक्सिन तथा फिड सप्लिमेन्टको कुल माग मध्ये २० प्रतिशत माग मात्र स्वदेशी उत्पादनले धानेको छ भने बाँकी ८० प्रतिशत विदेशबाट आयात हुने गरेको छ । नेपालमा पशुपन्छीको स्वास्थ्य उपचार पद्धतीमा चाहिने अत्यावश्यक तथा जीवनरक्षक औषधी, एण्टीवायोटिक्स, सुईजन्य औषधी लगायतको चरम अभाव रहेको भुजलले बताए । त्यस्ता औषधीहरु उत्पादन तथा दर्ताका लागि सरकारले वातावरण बनाउनुपर्ने उनी बताउँछन् ।
