काठमाण्डौ – कालीगण्डकी करिडोरको बाग्लुङ–गुल्मी खण्डमा सुक्खा पहिरो खसेपछि सडक बन्द भएको छ । बाग्लुङ र गुल्मीको सिमानामा पर्ने बाग्लुङको जैमिनी नगरपालिका–८ मा गएराति सुक्खा पहिरो खसेको हो । पहिरोपछि बाग्लुङ–गृल्मी खण्ड अन्तर्गत मालढुङ्गा–अर्वेनी सडक बन्द भएको छ।
बाग्लुङको मालढुङ्गादेखि गुल्मीको अर्बेनीसम्म ४४ किलोमिटर खण्ड कालोपत्रका लागि स्तरोन्नतिको काम भैरहेको छ । काम चलिरहेकै बेला पहिरो खसेपछि काम नै रोकिएको कालोपत्रको काम गरिरहेको निर्माण कम्पनी कालिका कन्स्ट्रक्सनका इञ्जिनियर छकबहादुर गुरुङले जानकारी दिनुभयो।
यो पहिरो हटाउन कम्तीमा एक हप्ता लाग्न सक्ने इञ्जिनियर गुरुङको भनाइ छ । यसबारेमा कालीगण्डकी करिडोर आयोजना कार्यालय पाल्पालाई पनि जानकारी गराइ सकेको उहाँले बताउनुभयो । सडक बन्द भएपछि लामो तथा छोटो दुरीका गाडी चल्न सकेका छैनन् । सदरमुकाम बाग्लुङ बजार, जैमिनी र बरेङ गाउँपालिकाबाट बुटवललगायतका ठाउँमा चल्ने गाडी र यात्रु समस्यामा परेका छन् ।
