काठमाण्डाै –
वैशाखमा सुक्खा र गर्मी बढेसँगै भएका आगलागी र वन डढेलोका घटनाबाट २६ जनाको ज्यान गएको छ ।
एक महिनामै आगलागीका घटनामा २० जना र वन डढेलोमा परेर छ जनाको ज्यान गएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ । यस्तै ८३ जना घाइते भएका छन् ।
आगलागीबाट एक हजार तीन सय ६४ र डढेलोबाट चार सय सात घरपरिवार प्रभावित भएका छन् । यस्तै वैशाखामा चट्याङबाट आठ जनाको ज्यान गएको छ ।
वैशाखमा इतिहासकै धेरै वन डढेलो भएको वन तथा भू–संरक्षण विभागले जनाएको छ । यस वर्ष हिउँदे वर्षा कम भएकाेले वन डढेलोका घटना बढेका विभागको वन डढेलो सूचना कक्षका वन अधिकृत गोविन्दकुमार श्रेष्ठले जानकारी दिनुभयो । यस्तै जलवायु परिवर्तनको असरका कारण पनि डढेलोका घटना जटिल बन्दै गएका विभागले जनाएको छ ।
