काठमाण्डौ
झण्डै डेढवर्षसम्म गाउँमा चितुवाले मान्छेलाई आक्रमण नगरेपछि केही राहात महशुस गरेका तनहुँको बन्दिपुरवासी पुनः त्रसित भएका छन् । यही साउन ३ गते बन्दीपुर गाउँपालिका–५ फलामडाँडामा चितुवाको आक्रमणबाट १३ वर्षीय बालकको ज्यान गएपछि गाउँमा पुनः त्रास फैलिएको बन्दीपुर गाउँपालिकाका अध्यक्ष सुरेन्द्र थापाले बताउनुभयो ।
डेढ वर्षदेखि गाउँमा चितुवा नदेखिएकोमा फेरि अहिले देखिएको उहाँले बताउनु भयाे। गाउँपालिकाले बेलुका र रातिका बेला बालबालिकालाई एक्लै नछाड्न र घरबाहिर ननिस्किन सचेत गराएको छ ।
यही साउन ३ गते १३ वर्षीय सुन्दर अछामीको ज्यान गएसँगै तनहुँमा चितुवाको आक्रमणबाट पछिल्लो ६ वर्षमा ज्यान गुमाउनेको सङ्ख्या १४ जना पुगेको छ । डिभिजन वन कार्यालय तनहुँकाअनुसार चितुवाको आक्रमणबाट २०७४ फागुन १ गते पछि १४ जनाले ज्यान गुमाएका हुन् । चितुवाको आक्रमणबाट व्यास नगरपालिका, भानु नगरपालिका, शुक्लागण्डकी नगरपालिका, आँबुखैरेनी गाउँपालिका, बन्दीपुर गाउँपालिकाका बालबालिकाको ज्यान गएको हो ।
