देवघाट ।
तनहुँको देवघाटस्थित श्री गाउँ सुधार समिति देवपुरले दुई वटा कार्यक्रम आयोजना गरेर एक लाख ३० हजार ५७२ रूपैयाँ ४२ पैसा बचत गर्न सफल भएको छ । समितिले गत साउन १८ देखि २६ गतेसम्म ‘सेन्ट्रल कलेज प्रथम देवपुर सेभेन ए साइड नकआउन खुला फुटबल प्रतियोगिता’ आयोजना गरेको थियो । उक्त प्रतियोगिताबाट ५८ हजार ८१२ रूपैयाँ ४२ पैसा बचत गर्न सफल भएको हो । 
दश दिनसम्म सञ्चालन भएको प्रतियोगितामा तनहुँसहित चितवन, नवलपरासी पूर्व र गोरखाका गरी ४० समूह सहभागी भएका थिए । प्रतियोगितामा प्रवेश शुल्कबाट मात्रै एक लाख १० हजार आठ सय रूपैयाँ आर्थिक सङ्कलन भएको कार्यक्रमका आर्थिक संयोजक प्रेमबहादुर थापामगरले जानकारी दिए ।
यस्तै गतवर्ष कात्तिक २५ गते आयोजना गरेको ‘सातौं देवपुर महोत्सव–२०८०’ बाट ७१ हजार ७६० रूपैयाँ बचत गर्न सफल भएको हो । समितिले मङ्गलबार सार्वजनिक सुनुवाइ नै गरेर दुई कार्यक्रमको हरहिसाब सार्वजनिक गरेको हो । समितिका अध्यक्ष शुकलाल गुरूङका अनुसार फुटबल प्रतियोगिता सम्पन्न गर्न चार लाख ६ हजार ७१ रूपैयाँ आम्दानी भएको थियो भने चार लाख २७ हजार ९६८ रूपैयाँ खर्च भएको थियो ।
यस्तै गतवर्ष तिहारमा भएको महोत्सवमा भने चार लाख ७४ हजार १० रूपैयाँ आम्दानी हुँदा चार लाख दुई हजार २५० रूपैयाँ खर्च भएको थियो । २०६३ सालमा स्थापना भएको गाउँ सुधार समितिले हरेक वर्ष विभिन्न खालको कार्यक्रम सञ्चालन गर्दै आइरहेको छ । संस्कृति संरक्षण, वातावरण सरसफाइ, खेलकुद विकास, शैक्षिक प्रगतिलगायतका विषयमा संस्थाले काम गर्दै आएको समितिका अध्यक्ष गुरूङले जानकारी दिए ।
आगामी दिनमा पनि यस्ता कार्यक्रमलाई निरन्तरता दिँदै संस्थालाई थप चलायमान बनाउँदै लैजाने उनले बताए । ‘आउँदा दिनहरूमा पनि हामीले गरेका सबै कार्यक्रमको आयव्यय यस्तै सार्वजनिक सुनुवाइमार्फत सार्वजनिक गर्नेछौँ,’ उनले भने, ‘किनकि हामीले संस्थालाई नियमानुसार सञ्चालन गर्नुपर्छ । आयव्ययलाई पारदर्शी बनाउन सक्नुपर्छ ।’यही संस्थामार्फत समाजमा सुशासन कायम गराउन सकिने बताउँदै समाजलाई सत्मार्गमा हिँडाउनको लागि सामाजिक संस्था नै अग्रसर हुनुपर्ने उनको भनाइ छ । 
देवघाट गाउँपालिका उपाध्यक्ष भुवन सिं गुरुङले देवघाट गाउँपालिका भित्रका अधुरो खेलमैदानहरुलाई पुरा गराउने बताए । उपाध्यक्ष गुरुङले गाउँपालिका खेलकुद बिकासको निम्ति सवै संग समन्वय गरि दीगो बिकासको लागि अगाडी बढ्ने बताए।
