भरतपुर
भरतपुर महानगरपालिका–६ स्थित देवनगर दुग्ध उत्पादक सहकारी संस्थाको उद्योगबाट कुहिएको ३०६ किलो नौनी बरामद गरी नष्ट गरिएको छ । बेच्न भनी उद्योगको कोल्ड स्टोरमा राखिएको ढुसी लागेर बिग्रिएको नौनी अनुगमन टोलीले बरामद गरी नष्ट गरेको हो ।
त्यस्तै, कोल्ड स्टोरमै राखिएको शङ्कास्पद ५० किलो ‘देव घिउ’ ब्रान्डको घिउलाई सिल गरिएको छ । देवनगर दुग्ध सहकारीले कुहिएको नौनी र घिउलाई ताजा घिउमा मिसाएर बिक्री गरिरहेको भनी जिल्ला प्रशासन कार्यालय र खाद्य प्रविधि तथा गुण नियन्त्रण डिभिजन कार्यालयमा मंगलबार उजुरी परेको थियो ।
दुवै नियामक निकायमा एकै प्रकृतिको उजुरी परेपछि जिल्ला प्रशासन कार्यालय चितवनका सहायक प्रमुख जिल्ला अधिकारी चिरञ्जीवी शर्माको नेतृत्वमा गएको अनुगमन टोलीले बुधबार सहकारीको उद्योगमा अनुगमन गरेको हो । सहकारीको उद्योगमा निरीक्षण गर्दा उजुरीमा भनिएको जस्तै कैफियत भेटिएको सहायक प्रजिअ शर्माले बताए । ‘ताजा घिउमा ढुसी लागेर बिग्रिएको नौनी र घिउ मिसाएर बिक्री गरिरहेको छ भन्ने उजुरी आएपछि हामीले अनुगमन गरेका थियौँ ।
ढुसी लागेर बिग्रिएको नौनी र घिउहरु पनि कोल्ड स्टोरमा राखिएको रहेछ । ढुसी लागेको ३०६ किलो नौनी हामीले नष्ट ग¥यौँ । बिग्रिएको वस्तुलाई पनि कोल्ड स्टोरमै किन राखियो भनेर हामीले थप अनुसन्धान गर्दै छौँ’, उनले भने । शङ्कास्पद घिउको गुणस्तर परीक्षणका लागि नमुना लिइएको उनले बताए । आधा किलोका ९८ वटा डब्बा र एक किलोको एउटा डब्बा गरी ५० किलो घिउ सिल गरेर छाडिएको छ । शङ्कास्पद घिउलाई बोरामा हाली लाहाछाप लगाई कोल्ड स्टोरमै राखिएको छ ।
नमुनाको ल्याब परीक्षण गरी प्रतिवेदन आएपछि सोहीअनुसार कारबाही प्रक्रिया अघि बढ्ने छ । प्रशासनले चाडपर्वलक्षित अनुगमनलाई निरन्तरता दिने उनले बताए । खाद्यान्न, डेरी, मासु पसललगायत अत्यावश्यक वस्तु बिक्री गर्ने पसल र उद्योगमा अनुगमन गरिने उनले जानकारी दिए । खाद्य प्रविधि तथा गुण नियन्त्रण डिभिजन कार्यालय चितवनका प्रमुख खाद्य अनुसन्धान अधिकृत सौरभ श्रेष्ठका अनुसार सहकारीको उत्पादनस्थलमा पुगेर निरीक्षण गर्दा प्रशोधन कक्षमै रहेको कोल्ड स्टोरमा उजुरीबमोजिमकै कैफियत फेला परेको हो ।
‘बिग्रिएको नौनी मुचुल्का गरी नष्ट गरेका छौँ । घिउको भने गुणस्तर यकिन गर्न खाद्य प्रविधिको हेटौँडा प्रयोगशालामा पठाउनलाई नमुना संकलन गरेका छौँ’, उनले भने । घिउको प्रतिवेदन विश्लेषणका आधारमा कारबाही प्रक्रिया अघि बढ्ने उनले जानकारी दिए ।
सहकारीका अध्यक्ष रत्नमणि न्यौपानेलाई बयानका लागि बिहीबार बोलाइएको छ । ढुसी लागेर कुहिएको नौनीलाई पनि कोल्ड स्टोरमा राख्नु शङ्कास्पद गतिविधि देखिन्छ । अखाद्य वस्तुलाई प्रशोधन कक्षमै भण्डारण गरेर राख्ने कार्य खाद्य ऐन, २०२३ को बर्खिलाप हुने हो । खान नहुने नौनी र शङ्कास्पद घिउ कोल्ड स्टोरमा किन राखियो भनी प्रश्न गर्दा सहकारीका अध्यक्ष न्यौपानेले प्रतिक्रिया दिन अस्वीकार गरे ।
