काठमाण्डाै –

वैदेशिक रोजगारीका लागि विभिन्न देशहरूमा पठाइदिने भन्दै सात लाख ५० हजार रुपैयाँ ठगी गर्ने दुई जनालाई प्रहरीले पक्राउ गरेको छ ।

पक्राउ पर्नेमा ताप्लेजुङको फुङलिङ नगरपालिका घर भई काठमाण्डौको कोटेश्वर बस्ने २९ वर्षीय प्रज्ञान उप्रेती र मकवानपुरको थाहा नगरपालिका घर भई काठमाण्डौको कलङ्की बस्ने ३२ वर्षीय विश्वराज रुम्बा रहेका काठमाण्डौ उपत्यका अपराध अनुसन्धान कार्यालयले जनाएको छ । उप्रेतीले एक जनाबाट पाँच लाख र रुम्बाले एक जनाबाट दुई लाख ५० हजार रुपैयाँ ठगी गरेका कार्यालयका प्रहरी उपरीक्षक एवम् सूचना अधिकारी काजीकुमार आचार्यले बताउनुभयो ।

उनीहरूले बेरोजगार युवायुवतीहरूलाई आकर्षक तलबको प्रलोभनमा पारी ब्रुनाई र क्रोएशियालगायतका देशहरूमा लैजाने भन्दै पैसा उठाएर सम्पर्कविहीन भएका थिए ।