सर्लाही
सर्लाहीको ईश्वरपुर नगरपालिका–२ मियाँखोरको पोखरीमा कार डुबेको छ ।
लु २ च ६७५८ नम्बरको कार अनियन्त्रित भई पोखरीमा डुब्दा गौशाला नगरपालिका–१० का सुरेश महतो र सोनवा गाउँपालिका–८ का रामाकान्त ठाकुर बेपत्ता भएको जिल्ला प्रहरी कार्यालय सर्लाहीले जनाएको छ ।
कार्यालयका प्रवक्ता प्रहरी नायब उपरीक्षक दीपक श्रेष्ठका अनुसार कारमा रहेका अर्का व्यक्ति महोत्तरीको गौशाला–२ का जनक यादव पौडिएर बाहिर निस्कनु भएको छ ।
घटनालगत्तै खोजी तथा उद्धारका लागि पुगेको प्रहरी टोलीले बेपत्ता भएका दुई जनालाई फेला पार्न नसकेपछि बर्दिबासको सशस्त्र प्रहरी बल नेपाल नम्बर २ छिन्नमस्ता बाहिनीबाट गोताखोर टोली बोलाएको प्रवक्ता श्रेष्ठले जानकारी दिनुभयो ।
