पाकिस्तानको एक अदालतले पाकिस्तानका पूर्वप्रधानमन्त्री इमरान खान र उनकी पत्नी बुशरा बीबीलाई भ्रष्टाचारको मुद्दामा दोषी ठहर गरेको छ ।
अदालतले खानलाई १४ वर्षको जेल सजाय सुनाएको छ । अदालतले खानकी पत्नी बुशरालाई सात वर्षको जेल सजाय सुनाएको एएफपीले जनाएको छ । अदालतले खानलाई १० लाख र उनकी पत्नी बुशरालाई पाँच लाख जरीवाना पनि तोकेको छ ।
अल–कादिर ट्रस्ट नामक कल्याणकारी फाउन्डेशनका नाममा भएको आर्थिक अनियमितताका कारण खान दम्पतीलाई अदालतले दोषी ठहर गरेको हो ।
पूर्वप्रधानमन्त्री खान सन् २०२३ को अगस्टदेखि जेलमा छन् र उनीमाथि झन्डै दुई सय वटा मुद्दा लगाइएका छन् । ती मुद्दा आफूलाई सत्तामा फर्कनबाट रोक्नका लागि राजनीतिक प्रतिशोधबाट प्रेरित भएको उनको दाबी छ ।
खानकी पत्नी बुशरा बीबी भर्खरै जेलबाट रिहा भएकोमा फैसलापछि आज अदालत परिसरबाटै पक्राउ गरिएको छ । आज बिहान अदालतको सुनुवाइमा भाग लिन बुशरा खानलाई राखिएको जेलमा उपस्थित भएकी थिइन् ।
