चितवन ।
चितवनमा अवस्थित सेन्ट्रल मोडेल कलेजले विद्यार्थीलाई भव्य कार्यक्रमका साथ स्वागत गरेको छ । यस बर्षदेखि व्याचलर अफ इन्फरमेशन म्यानेजमेन्ट (बिआईएम) र व्याचलर अफ होटल म्यानेजमेन्ट (बिएचएम) अध्यापन सुरु गरेको कलेजले पोखराको पाँचतारे पोखरा ग्राण्ड होटलमा विद्यार्थीलाइ स्वागत गरेको हो । साथै कलेजको आन्तरिक परीक्षा तथा अतिरिक्त क्रियाकलापमा उत्कृष्ट भएका विद्यार्थीलाई सम्मान गरेकोे छ ।
कलेजका अध्यक्ष यज्ञ विलास (वाइबी) पौडेलको अध्यक्षतामा भएको कार्यक्रममा त्रिभुवन विश्वविद्यालय म्यानेजमेन्ट संकायका डिन प्रोफेसर डाक्टर महानन्द चालिसेकोे प्रमुख आतिथ्यता रहेको थियो । कार्य्रमको उद्घाटन गदै डिन चालिसेले उच्च शिक्षाका लागि बिभिन्न देशमा जाने विद्यार्थीलाई परामर्श र भिजा प्रोसेसिङको काम गर्दै आइरहेको सेन्ट्रल कलेजले नेपालको शैक्षिक विकासका लागि स्नातक तहको अध्यापन सुरु गर्नु प्रशंसनिय काम भएको बताउनुभयो । उहाँले सेन्ट्रल मोडेल कलेजसंग हरेक पल सहकार्य गरेर काम गर्न त्रिवि विश्वविद्यालय तयार रहेको बताउनुभयो । उहाँले कलेजका अध्यक्ष पौडेलले विश्वबाट लिनुभएको अनुभव नेपालको शिक्षा क्षेत्रको विकासका लागि अर्थपूर्ण रहेको उल्लेख गर्नुभयो । 
कलेजका अध्यक्ष पौडेलले विश्वसंग प्रतिस्पर्धा गर्ने शिक्षा सेन्ट्रल मोडेल कलेजले चितवनबाटै प्रदान गर्ने बताउनुभयो । आफूँले धेरै देश घुमेर त्यहाँको शिक्षा प्रणालीलाई नजिकबाट नियालेको र त्यहाँको जस्तै गुणस्तरिय शिक्षा प्रदानका लागि प्रयास गरिरहेको उहाँको भनाइ छ । उहाँले कलेजले गुणस्तरमा कुनै सम्झौता नगर्ने र अन्तर्राष्ट्रिय स्तरमा प्रतिशपर्धा गर्न सक्ने जनशक्ती उत्पादन गर्ने बताउनुभयो ।
कार्यक्रममा प्रिन्सिपल डा.टिकाराम चालिसे, सल्लाहाकार देविदास भट्टराई, सल्लाहाकार सुदन नेपाली, एचवडी अफ बिएचएम प्रकाश पाण्डे, एचवडी अफ बिआइएम सुनिल कुमारसिंह लगायतले मन्तव्य व्यक्त गर्नुभएको थियो ।
उक्त स्वागत कार्यक्रममा सयभन्दा बढि विद्यार्थी सहभागि भएका थिए ।
सेन्ट्रल मोडल कलेजले त्रिभुवन विश्वविद्यालयबाट सम्बन्धन प्राप्त गरेको छ । कलेजले व्याचलर अफ इन्फरमेशन म्यानेजमेन्ट (बिआईएम) र व्याचलर अफ होटल म्यानेजमेन्ट (बिएचएम) कार्यक्रम सञ्चालन गरिरहेको छ । पहिलो बर्षमानै कलेजमा उल्लेख्य विद्यार्थी भर्ना भएका छन । कलेजले नेपालकै उत्कृष्ट होटल म्यानेजमेन्ट तथा विआइएम ल्याब निर्माण गरेको छ ।
