काठमाण्डौ –
एएफसी २० वर्षमुनिको महिला एशियन कप छनोटमा नेपाल र भूटानबीचको खेल बराबरीमा रोकिएको छ ।
आयोजक भुटानविरुद्धसँग हिजो भएको खेलमा नेपाल १–१ गोलको बराबरीमा रोकिएको हो । भूटानविरुद्ध नेपालकी सेनु परियारले खेलको ४० औं सेकेण्डमा गोल गरे पनि नेपालले लामो समय अग्रता जोगाउन सकेन ।
खेलको १८ औं मिनेटमा भूटानले गोल फर्कायो । भूटानको लागि केल्देन वाङमोले बराबरी गोल गरिन् । त्यसपछि खेलको ७० औं मिनेटमा नेपालले गोल गर्याे । तर असिस्टेन्ट रेफ्रीले अफ साइडको झण्डा उठाएपछि दुवै टोलीबाट दोस्रो हाफमा गोल हुन सकेन ।
प्रतियोगीतामा नेपालले महत्त्वपूर्ण ३ अङ्क जोड्ने मौका गुमाएको छ । नेपाल र भूटानले समान १–१ अङ्क जोडे ।
यसअघि बङ्गलादेशमा भएको साफ २० वर्षमुनिको च्याम्पियनशिपमा भने नेपालले भूटानलाई ६–१ र ८–० ले हराएको थियो ।
छनोट समूह ‘ए’ मा नेपालसँगै आयोजक भूटान, साउदी अरेबिया र उत्तर कोरिया छन । समूह विजेताले सन् २०२५ मा थाइल्यान्डमा हुने एएफसी–२० वर्षमुनिको महिला एशियन कप खेल्नेछन ।
