प्रधानमन्त्री सुशीला कार्कीले हालै सम्पन्न युवापुस्ताको जेन जेड आन्दोलनमा अनेकौं युवाले ज्यान गुमाउनुपरेको पीडा अझै ताजा रहेको उल्लेख गर्दै यस वर्ष आफूले टिका-जमरा नलगाउने र नागरिकलाई समेत टिका लगाउने कुनै औपचारिक कार्यक्रम नरहेको जनाएकी छिन् ।
बडादसैं २०८२ को अवसरमा प्रधानमन्त्रीको स्वकीय सचिवालयमार्फत जारी सन्देशमा उनले स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरूप्रति शुभकामना व्यक्त गर्दै आफूले टिका नलगाउने र नलगाई दिने निर्णय भएको जनाइएको छ ।
प्रधानमन्त्री कार्कीले सुख, शान्ति, समृद्धि, सुस्वास्थ्य तथा प्रगतिका लागि शुभेच्छा दिँदै बडादसैंले पारिवारिक मिलन, सामाजिक मेलमिलाप र सद्भाव बढाउन सहयोग पुर्याओस् भन्ने अपेक्षा व्यक्त गरेकी छिन्।
दुर्गा भवानीले राष्ट्रलाई शक्ति प्रदान गरून् भन्ने कामना गर्दै उनले मुलुकमा स्थायित्व, शान्ति, सुशासन र समृद्धिको यात्रामा सबैलाई सहभागी भई देश विकासमा जुट्न हार्दिक अपीलसमेत गरेकी छिन्।
