काठमाडौं : नेकपा एमालेका अध्यक्ष केपी शर्मा ओलीले देशलाई संवैधानिक बाटोमा फर्काउन संसद पुनःस्थापना हुनैपर्ने बताएका छन्।
उनले बेठिक तत्वसँग नझुकेको एमाले दुई दिनको आन्दोलनको बलमा निर्माण भएको असंवैधानिक सरकारसँग समेत नझुक्ने तर्क गरे।
त्यस्तै अध्यक्ष ओलीले देश छाडेर नभाग्ने स्पष्ट पारे। ‘अहिले यो फेद न टुप्पोको सरकार, जरा पनि छैन, हाँगा पनि छैन । एउटा पहेंलो लहरो हुन्छ नि एउटा, आकाशबेली जस्तै कहाँबाट पलायो कहाँबाट। यो आकाशबेली सरकारले हामीजस्तो कमिटमेन्ट भएको मान्छेलाई पासपोर्ट रोक्का गर्छ। के काम गर्छ यसले?,’ उनले प्रश्न गरे।
उनले मर्न परे पनि देशमै मर्ने भन्दै अनुत्तरदायी सरकारलाई देश सुम्पिएर नभाग्ने बताए। ‘केपी ओली भागेर जान्छ? सुकरात त्यसबेला भागेनन्। आजको केपी ओली भाग्छ। के सोचेको होला? मैले अस्ति नै भनेँ यो हाहुमा बनेको गैरजिम्मेवार कसैप्रति जिम्मेवार नभएको असंवैधानिक सरकारलाई अनुत्तरदायी सरकारलाई देश सुम्पिएर केपी ओली भागेर जान्छ?,’ उनले प्रश्न गरे।
