काठमाडौँ
नेपाल भ्रमणमा रहेका चिनियाँ कम्युनिस्ट पार्टी (सीपीसी) का विदेश विभाग प्रमुख लिउ चियानछाओ र माओवादी केन्द्रका अध्यक्ष पुष्पकमल दाहालबीच भेटवार्ता भएको छ । दाहाललाई भेट्न चिनियाँ नेता लिउ सोमबार साँझ खुमलटार पुगेका थिए।
माओवादीका उपाध्यक्ष नारायणकाजी श्रेष्ठका अनुसार नेता लिउसँगको भेटको क्रममा लिउले नेपालका दलहरू आफ्नो निर्णय आफैं लिनसक्ने क्षमता विकास गरुन् भन्ने चाहना राखेको पनि बताएका थिए ।
'नेपालका कुनै पनि दलहरूले आफ्नो बारेमा आफैं फैसला गर्ने क्षमताको विकास गर्नुपर्छ भनेर उहाँले आफ्नो विचार व्यक्त गर्नुभयो । तर हामीलाई उहाँले यसो गर्नुपर्छ भनेर हस्तक्षेप नगर्ने चीनको नीति रहेको बताउनुभयो,' भेटपछि चिनियाँ नेतालाई उद्धृत गर्दै माओवादी उपाध्यक्ष श्रेष्ठले बताए ।
माओवादी अध्यक्ष दाहालले भने नेपालमा चीनविरोधी कुनै पनि गतिविधि गर्न नदिने कुरामा आफ्नो पार्टी र सिंगो देश प्रतिवद्ध रहेको प्रतिक्रिया दिएका थिए । साथै उनले आफ्नो पार्टी र सिंगो देश नै 'एक चीन' नीतिप्रति प्रतिवद्ध रहेको बताएका थिए ।
नेपाल एक असल छिमेकी देश भएको र नेपालले कुनै पनि देशसँग सम्बन्ध राख्ने कुरामा आफूहरूले सहयोग गर्ने लिउको भनाइ रहेको पनि नेता श्रेष्ठले जानकारी दिए । साथै चीनले अहिलेसम्म गरेको सहयोगमा नेता दाहालले धन्यवाद व्यक्त गरेको पनि नेता श्रेष्ठले जानकारी दिए ।
नेता लिउले यसअघि प्रधानमन्त्री शेरबहादुर देउवा र परराष्ट्रमन्त्री नारायण खड्कासहितका उच्च अधिकारीहरूसँग भेट गरिसकेका छन् ।
