रामेछाप
लगातारको वर्षासँगै खसेको पहिरोका कारण सोमबार साँझदेखि मन्थली-खिम्ती सडकखण्ड अवरुद्ध भएको छ ।
मन्थली नगरपालिका २ बान्द्रेमा आइतबार पनि पहिरो झरेको थियो । सोमबार पनि सोही स्थानमा पहिरो थपिएपछि सडक अवरद्ध भएको हो । सडक माथिबाट पहिरो बग्ने क्रम नरोकिएकाले पन्छाएर तत्कालै आवागमन खुलाउन कठिन रहेको बताइएको छ ।
जोखिमका बावजुद आइतबार मन्थली नगरपालिकाले पहिरो सफा गरेर साँझ अवेर आवागमन खुलाएको थियो । सोमबार फेरि पहिरो खस्दा सडक अवरद्ध बनेको हो । तिल्पुङ छहरा नजिकै गत वर्ष झरेकै स्थानमा सोमबार पहिरो गएको पूर्ववडा अध्यक्ष सुवास बोहोराले बताए ।
उक्त स्थानमा खिम्ती –ढल्केबर २२० केभी प्रशारण लाइनको पोल रहेको छ । पहिरोले उक्त पोल जोखिममा परेको उनले बताए । प्रशारण लाइनबाट हाल माथिल्लो तामाकोसी जलविद्युत आयोजना लगायतको उत्पादन ढल्केबर सब–स्टेशनमा पठाउने गरिएको छ ।
