काठमाडौं
नेकपा एमालेका नेता भीम रावलले सरकारप्रति धेरै नै अविश्वास रहेको बताएका छन् । अमेरिकी स्टेट पार्टनरसिप प्रोग्राम (एसपीपी) को सन्दर्भमा परराष्ट्रमन्त्री डा नारायण खड्काको व्यवहारले सरकारप्रति अविश्वास पैदा भएको उनको भनाइ छ ।
राज्यको निर्देशक सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको आजको बैठकमा रावलले एसपीपीसँग सम्बन्धित कागजात सांसदहरुले माग गर्दा परराष्ट्रमन्त्री खड्काले आफूहरुलाई अविश्वास गरेर नदिएको बताए ।
‘परराष्ट्र मन्त्रीजीले संसदमा दिनुभएको जवाफ मैले सुनें । उहाँले के भन्नुभयो भने सरकारको तर्फबाट पत्र पठाइसकेपछि पत्र माग्नु भनेको सरकारप्रति कताकता अविश्वास हो,’ पूर्वमन्त्री रावलले भने, ‘कताकता होइन, धेरै अविश्वास छ । किनभने अमेरिकी स्टेट पार्टनरसिप प्रोग्राममा हामी सहभागी हुँदैनौं भनाउन कति आवाज उठाउनुपर्यो देशमा । संसदमा कति बोल्नुपर्यो । स्वाभाविक रुपमा अविश्वासको वातावरण हुन्छ ।’
उनले अगाडि भने, ‘संसदलाई आफैं पत्र नदिने अनि भन्ने चाहिं सरकारलाई विश्वास नगरेको । उहाँहरुले संसदलाई विश्वास गरेको खैत ? सरकार त संसदप्रति उत्तरदायी हुन्छ नि । संसद सरकारप्रति उत्तरदायी हुँदैन ।’
