साेलुखुम्बु
नेपाली कांग्रेसका केन्द्रीय सदस्य बलबहादुर केसीले सोलुखुम्बुमा प्रतिनिधि सभा सदस्यका लागि उम्मेदवारी दर्ता गराउनुभएको छ । यो उहाँको सातौँ उम्मेदवारी हो ।
२०४८ सालयताको संसदीय चुनावमा उहाँ सोलुखुम्बुबाट लगातार प्रतिस्पर्धा गर्दै आउनुभएको छ । पूर्वमन्त्रीसमेत रहेका केसीले यसअघि लडेका ६ चुनावमध्ये चारमा जित र दुई वटा चुनावमा हार बेहोर्नुभएको थियो । उहाँ २०६४ र २०७४ सालको चुनावमा पराजित हुनुभएको हो ।
यस पटक उहाँले सत्तारूढ गठबन्धनको तर्फबाट उम्मेदवारी दिनुभएको छ । नेपाली कांग्रेस सोलुखुम्बुले समानुपातिकमा नाम सिफारिस गरेका केसीले शेखर कोइराला समूहको दबाबका बीच जिल्लाको सिफारिस विना नै टिकट लगेर चुनावी मैदानमा आउनुभएको हो ।
यस्तै सोलुखुम्बुको प्रदेश सभाको दुवै निर्वाचन क्षेत्र माओवादी केन्द्रले पाएको छ । प्रदेश सभातर्फ सोलुखुम्बुको क्षेत्र नम्बर 'क' मा गोम्बु शेर्पा कर्ज्याङ र 'ख' मा शिवबहादुर बस्नेत राजेन्द्र उम्मेदवार बन्नुभएको छ ।
