गोरखा – नवौँ राष्ट्रिय खेलकुद प्रतियोगिताअन्तर्गत गोरखामा भएको बुद्धिचाल प्रतियोगितामा नेपाली सेनाको त्रिभुवन आर्मी क्लबले ५ स्वर्णसहित १० पदक जितेको छ ।
बुद्धिचालको ६ स्वर्णसहित १८ पदकका लागि भएको प्रतियोगितामा आर्मीकी सुजना लोहनीले तीन स्वर्ण पदक जित्दै कीर्तिमान कायम गरिन् । प्रतियोगिताको २७ खेलमा नै सुजना अपराजित रहिन् । बुद्धिचालमा यो कीर्तिमान कायम गर्ने उनी पहिलो खेलाडी बनेकी प्रतियोगिताका एक निर्णयक यासिर खम्बुले बताउनुभयो । लोहनीले महिलातर्फको क्लासिकल, र्यापिड र ब्लिट्ज गरी ३ वटै विधामा स्वर्ण पदक जितेकी हुन् । महिलातर्फको क्लासिकलमा आर्मीकै सिन्दिरा जोशीले रजत र प्रदेश १ की खुश्वु थापाले कास्य पदक जितिन् ।
महिला र्यापिडमा प्रदेश १ की कृतिसरा अधिकारीले रजत र गण्डकी प्रदेशकी पूजा भण्डारीले कास्य पदक जितिन् । महिलातर्फको ब्लिट्ज राउन्डमा नेपाल पुलिस क्लबकी पूर्णिमा गुरुङले रजत र त्रिभुवन आर्मीकी सिन्दिरा जोशीले कास्य पदक जितिन् । खुलातर्फको र्यापिड र ब्लिट्ज राउन्डमा पनि आर्मीकै रुपेश जयसवालले दोहोरो स्वर्ण पदक जिते । यस्तै र्यापिडमा त्रिभुवन आर्मी क्लबका मिलन लामाले रजत र पुलिस क्लबका सुरवीर लामाले कास्य पदक जिते । खुलातर्फको ब्लिट्ज राउन्डमा पुलिस क्लबका क्षितिज भण्डारीले रजत र त्रिभुवन आर्मीका सजिन महर्जनले कास्य पदक जिते ।
खुला क्लासिकलतर्फको तीन वटै पदक भने होल्ड गरिएको आयोजकले जनाएको छ । गैरआवासीय नेपाली सङ्घका पाँच जना खेलाडीलाई मापदण्ड विपरीत सहभागी गराइएको भन्दै प्रदेश नम्बर १ को खेलकुद बोर्डले दाबी विरोध पेस गरेपछि मेडल र प्रमाणपत्र वितरण नगरिएको बुद्धिचाल प्रतियोगिताका निर्णायक मध्येका एक यासिर खम्बुले बताउनुभयो । क्लासिकल खुलामा गैरआवासीय नेपाली सङ्घका आशिष फुयाँलले स्वर्ण जितेका थिए । जितलगत्तै दाबी विरोध परेपछि आयोजकले औपचारिकरूपमा नतिजा पनि सार्वजनिक गरेको छैन । यसबारे राष्ट्रिय खेलकुद परिषद्ले अन्तिम निर्णय गर्ने बताइएको छ ।
पदक विजेताहरूलाई जिल्ला समन्वय समितिका प्रमुख मोहनबहादुर थापालगायतले मेडल र प्रमाणपत्र प्रदान गरेका थिए ।
नवौँ राष्ट्रिय खेलकुद प्रतियोगिताअन्तर्गतका धेरैजसो खेल पोखरामा भइरहेका छन् । आसपासका जिल्लामा केही विधामा खेल गर्ने राखेपको निर्णयअनुसार बुद्धिचाल प्रतियोगिता गोरखामा भएको हो । गोरखा क्याम्पसको हलमा असोज २७ गतेदेखि सुरु भएको प्रतियोगिता बुधवार सकिएको हो ।
