६ कात्तिक, काठमाडौं । पूर्वप्रधानमन्त्री डा.बाबुराम भट्टराई नेतृत्वको नेपाल समाजवादी पार्टी (नेसपा)ले चुनावी प्रतिबद्धतापत्र सार्वजनिक गरेको छ ।
जहाँ पपुलिस्ट नारा दिएर जनताको ध्यान तान्ने प्रयास गरिएको छ ।
‘काठमाडौदेखि सगरमाथा बेस क्याम्पसम्म केवलकार’ प्रतिबद्धतापत्रको १३ नम्बरको ‘केवलकार’ शीर्षकमा उल्लेख छ । यसको सुनिश्चितता कसरी हुन्छ भन्ने विषयलाई प्रतिबद्धतापत्रको सुरुमै लेखिएको छ, आर्थिक विकास तथा समृद्धिका योजनाहरू संघीयस्तर र प्रादेशिक स्तरका रणनीतिक महत्वका आयोजनाहरूलाई बजेटको कमि हुन नदिई सम्पन्न गरिनेछ ।’
यसैगरी, रसुवागढी–काठमाडौं–पोखरा–लुम्बिनी–चितवन–काठमाडौं रेल लुप निर्माण गर्ने पनि डा.भट्टराई नेतृत्वको पार्टीको चुनावी प्रतिबद्धता छ । साथै, काठमाडौं–वीरगञ्ज रेलमार्ग निर्माण गर्ने पनि प्रतिबद्धता छ ।
विगतमा एमाले अध्यक्ष केपी शर्मा ओलीले रेलको सपना देखाउँदा डा.भट्टराईले आलोचना गरेका थिए ।
२०१६ मे १७ मा डा. भट्टराईले ओलीको रेल सपनाको आलोचना गर्दै ट्वीट गरेका थिए, ‘प्रमले रेल/पानीजहाज दिनुभन्दा पहिले काठमाडौं लगायतका शहरमा सार्वजनिक बस सेवा दिने कष्ट गर्ने कि ? फराकिलो पारिएको सडकमा ट्राफिक जाम उस्तै जो छ !’
तर ६ वर्षपछि डा. भट्टराईले ओली भन्दा अगाडि बढेर रेलको सपना बाँडेका छन् । जबकी काठमाडौं लगायतका शहरमा सार्वजनिक बस सेवा डाक्टर भट्टराईले ट्वीट गरेको बेलाको जस्तै छ अर्थात सार्वजनिक बस सेवामा खासै सुधार भएको छैन ।
