१८ कात्तिक, काठमाडौं ।
नेपाली कांग्रेसले सुरक्षा समितिसँग समन्वय गर्दै आगामी मंसिर चार गते हुने प्रतिनिधि सभा र प्रदेश सभा सदस्य निर्वाचन शान्तिपूर्ण ढंगले सम्पन्न गर्न भूमिका खेल्ने निर्णय गरेको छ ।
नेपाली कांग्रेसको निर्वाचन सुरक्षा निकाय समन्वय उपसमितिको बैठकले सो निर्णय गरेको हो । उपसमितिका संयोजक एवम् कांग्रेस केन्द्रीय सदस्य जितजंग बस्नेतको अध्यक्षतामा बसेको बैठकले निर्वाचनलाई शान्तिपूर्ण तथा सौहाद्रपूर्ण ढंगले सम्पन्न गर्न प्रदेश र जिल्ला तहदेखि नै सुरक्षा समितिसँग समन्वय गर्ने निर्णय गरेको हो ।
उपसमिति संयोजक बस्नेतका अनुसार प्रदेश तथा जिल्ला संयोजकहरुले प्रदेश तथा जिल्ला निर्वाचन सुरक्षा समन्वय समिति गठन गरी बैठक बस्ने, प्रदेश संयोजकले जिल्ला संयोजकसँग समन्वय तथा अनुगमन गर्ने र प्रदेश संयोजकले क्षेत्रीय सुरक्षा समितिसँग समन्वय गर्ने छन् ।
प्रदेश संयोजकले जिल्ला सुरक्षा समितिसँग समन्वय गर्ने र केन्द्रीय सुरक्षा समन्वय समितिका सम्बन्धित जिल्लाका सदस्यहरुसँग समन्वय गर्ने गरी जिम्मेवारी निश्चित गरिएको केन्द्रीय सदस्य बस्नेतले बताए ।
सुरक्षा समन्वय उपसमितिका सदस्यहरुले सम्बन्धित प्रदेश तथा जिल्ला संयोजकसँग सम्पर्क समन्वय गर्ने पनि उनले बताए ।
