काठमाडौँ, कात्तिक २६-
पाँचौ प्रधानमन्त्री कप एक दिवसीय क्रिकेट प्रतियोगितामा आर्मीले टिममा सोमपाल कामीलाई राख्दा एपीएफले खेल खेल्न अस्वीकार गरेको छ । आज हुने फाइनल खेलमा डेंगु संक्रमणका कारण टिम बाहिर रहेका सोमपाललाई टिममा समावेश गरेपछि एपीएफले टस गर्न अस्वीकार गरेको हो।
प्रतियोगिताको सुरुआतमा पनि सोमपालको नाम आर्मीको टोलीमा थियो । डेंगुका कारण टिम बाहिर रहेका सोमपालको स्थानमा आर्मिले अनिललाई टोलीमा राख्यो । तर फाइनलका लागि भने आर्मीले सोमपाललाई टोलीमा समेट्यो । जसका कारण फाइनल खेललमा विवाद उत्पन्न भएको हो ।
त्यस्तै आर्मी र एपीएफबीचको खेल बिहान ९ बजेदेखि टियु क्रिकेट मैदानमा सुरु हुने तालिका रहेको थियो । तर सोमपाललाई खेलाउने विवादका कारण खेल सुरु हुन ढिला भएको छ ।
आर्मीले प्लेइङ ११ मा सोमपालको नाम समावेश गरेपछि एपीएफका कप्तान शरद भेषावकरले टस गर्न नमानेनन् । म्याच रेफ्री वुद्धिबहादुर प्रधानलाई आर्मीको टोलीले सोमपाललाई टिममा राख्न नपाउने तक पेस गरेको छ ।
