मङ्सिर ४ गते हुने प्रतिनिधि एवं प्रदेशसभा चुनावको लागि आवश्यक पर्ने मतदान केन्द्रको निर्माण भइरहेको छ । आइतबार बिहान ७ बजेदेखि अपराह्न ५ बजेसम्म हुने मतदानका लागि निर्वाचन आयोगले १ करोड ७९ लाख ८८ हजार ५७० मतदाताको लागि देशभर २२ हजार २२७ मतदान केन्द्र तोकेको छ ।
यो निर्वाचनमा प्रतिनिधि सभातर्फ पहिलो हुने निर्वाचित हुने निर्वाचन प्रणालीका लागि २ हजार ४१२ जना उम्मेदवार चुनावी प्रतिस्पर्धामा छन् । यसैगरी प्रतिनिधि सभाको समानुपातिक निर्वाचन प्रणालीतर्फ २ हजार १९९ उम्मेदवारको नाम अन्तिम बन्द सूचीमा कायम गरिएको आयोगले जनाएको छ ।
प्रदेश सभातर्फ पहिलो हुने निर्वाचित हुने निर्वाचन प्रणालीका लागि ३ हजार २२४ जना उम्मेदवार चुनावी प्रतिस्पर्धामा छन् भने प्रदेश सभाको समानुपातिक निर्वाचन प्रणालीतर्फ ३ हजार ७०८ जना उम्मेदवारको नाम अन्तिम बन्द सूचीमा कायम छ ।
आइतबारको मतदानका लागि निर्वाचन आयोगले मतपेटिका लगायत अन्य विभिन्न सामग्री बिहीबार नै मतदान अधिकृतको कार्यालयमा पठाइसकेको थियो । शुक्रवार भने मतपत्र सम्बन्धित केन्द्रमा पठाइएको थियो । यस पटकको चुनावको लागि निर्वाचन आयोगले करिब २ लाख ४६ हजार ९६० कर्मचारी एवं आवश्यकता अनुसारका सुरक्षाकर्मी मतदान स्थलमा खटाइसकेको छ ।
