काठमाडौं
रवि लामिछाने नेतृत्वको राष्ट्रिय स्वतन्त्र पार्टीमा विवाद चर्किएको छ। समानुपातिक सांसद सिफारिसमा चलखेल गरिएको भन्दै नेता गणेश कार्कीले सार्वजनिक रुपमै असन्तुष्टि पोखेका छन् ।
‘म नि झन्डै सांसद भएको थिएँ । हुन्थेँ पनि, यदि राष्ट्रिय स्वतन्त्र पार्टीका महामन्त्री तथा प्रवक्ता मुकुल ढकालजीले आफ्नो गुरुमालाई गुरुदक्षिणा र आफ्नो कर्मचारीलाई अवसर दिन नपरेको भए’, उनले फेसबुकमा लेखका छन् ।
उनका अनुसार समानुपातिकको १२ वटा क्लस्टरमा पार्टीभित्र प्रारम्भिक निर्वाचन भएको थियो । जसमा उनी खसआर्य खुलातर्फको दोस्रो नम्बरमा र दिपक बोहोरा तेस्रो नम्बरमा थिए । ‘समावेशी र आरक्षणको बिषय के हो भने खुलातर्फबाट महिलाको ३३ प्रतिशत पुगेन भने मात्रै ३३ प्रतिशत पुर्याउने गरि महिलालाई राख्नै पर्ने हुन्छ । नियम त्यही हो’, उनले सामाजिक सञ्जालमा भनेका छन्, ‘त्यही अनुसार पहिलो प्राथमिकता हाम्रो पार्टीबाट ५ जना महिला पर्ने र बाँकी खुलाबाट हुनु पर्ने हो । यसैले मेरो र दिपकजीको सांसद हुने पक्कापक्की नै हो । तर आफ्नालाई काखी च्यापियो ।’
उनले जति प्रयास गरे पनि थिति बसाउन नसकिएको बताएका छन् । ‘म अन्तिमसम्म थिति, बिधि भन्दै आवाज उठाइरहेँ । यत्रा मानिसहरुले आशा गरेको पार्टीलाई दुरुपयोग गर्नबाट रोक्न सकिनँ’, उनले भनेका छन्, ‘मेरो भागमा पर्ने कमजोरी स्विकार्दै माफी चाहन्छु । तर यो यात्रा रमाइलो थियो । पुरानालाई एउटा दामी धक्का हानिएकै हो तर त्यसको उपलब्धिको दुरुपयोग भयो । यो यात्रामा साथ दिने, मलाई विश्वास गरेर घण्टीमा भोट दिने वा माग्ने सबैप्रति आभारी छु ।’
उनले अब रास्वपालाई समर्थन गर्ने कि नगर्ने जोसुकैको व्यक्तिगत अधिकारको कुरा भएको भन्दै आफ्नो ब्रह्मले सहि ठानेको निर्णय गर्न पनि अपील गरेका छन् । उनले आफूले आरोप नलगाएको भन्दै सबै प्रमाणित कुरा भएको पनि दाबी गरेका छन् ।
