चितवन, पुस ६
चितवनको भरतपुरस्थित वीरेन्द्र बहुमुखी क्याम्पसमा चरम बेथिति र लापरवाही बढ्दै गएको छ । क्याम्पस प्रशासनले शैक्षिक गुणस्तर वृद्धिमा ध्यान दिन नसक्दा लापरवाही र बेथिति बढ्दै गएको हो ।
क्याम्पसमा हुने लापरवाही र गल्तीलाई क्याम्पस प्रमुख प्राध्यापक डा दयाराम पौडेलले पनि स्वीकार गरेका छन् । उनले हाजिरीलाई राम्रोसँग अनुगमन गर्न नसक्नु आफूहरुको कमजोरी भएको बताए । उनले भने, ‘ कक्षामा पढाइ भएको वा नभएको अनुगमन गर्ने काम हरेक विभागीय प्रमुखहरुबाट हुनुपर्छ । क्याम्पसमा ३०० शिक्षक र ५० जना कर्मचारी छन् । यस्ता कमजोरीलाई सुधार गर्नुपर्छ । व्यक्तिको पनि कमजोरी छ । यस्ता गल्ती गर्नेलाई कारबाही गर्नुपर्छ ।’ उनले क्याम्पसमा सबैलाई व्यवस्थापन गरेर प्रशासन चलाउन गाह्रो भएको बताए । उनले भने, ‘क्याम्पसको व्यवस्थापनमा सबैको सहयोग आवश्यक छ ।’ वीरेन्द्र बहुमुखी क्याम्पसका प्राध्यापकहरुको अन्यत्र निजी क्याम्पसहरुमा लगानी भएकोले पनि क्याम्पसमा तोकिएको समयमा प्राध्यापकहरु बस्न नसक्ने विद्यार्थी र अभिभावकहरुको गुनासो छ । काम नै नगरे पनि तलब पाइन्छ भन्ने कर्मचारी र प्राध्यापकमा गलत मानसिकता रहेको कारणले वीरेन्द्र क्याम्पस धरासायी बन्दै गएको अभिभावकहरुको आरोप छ ।
विसं २०२२ सालमा स्थापित वीरेन्द्र बहुमुखी क्याम्पस चितवनको एक मात्र त्रिभुवन विश्वविद्यालयको आंगिक र पुरानो क्याम्पस हो । चितवनमा मात्र नभई समग्र चितवन र यसको वरपरका जिल्लाबाट विद्यार्थीहरु क्याम्पसमा अध्ययन गर्न आउँछन् ।
