१७ पुस, काठमाडौं
नेकपा एकीकृत समाजवादीका नेता झलनाथ खनालले सरकारका विषयमा आफूहरु पर्ख र हेरको अवस्थामा रहेको बताएका छन् ।
पार्टीको स्थायी कमिटी बैठकपछि पत्रकारहरुसँग संक्षिप्त कुरा गर्दै उनले सरकारमा रहेका दलहरुले सहयोगको प्रस्ताव नगरेसम्म पर्ख र हेरकै अवस्थामा रहने बताएका हुन् ।
खनालले अघि भने, ‘जबसम्म उनीहरुले आफ्नो कुरा ल्याउँदैनन्, राख्दैनन्, सार्वजनिक गर्दैनन् त्यतिबेलासम्म हामी पर्ख र हेरकै अवस्थामा रहने स्थायी कमिटीका साथीहरुको धारणा छ ।’
आफूहरु आम रुपमा वामपन्थी एकताकै पक्षमा रहेको भन्दै उनले त्यसका लागि सिद्धान्त र नीति मिल्नुपर्ने बताए ।
‘वामपन्थी एकता टाउको जोडेरमात्र हुने होइन, नीति निष्ट एकता हो, सिद्धान्तनिस्ट एकता हो’ उनले भने, ‘आफूलाई कम्युनिस्ट भन्नेहरुसँग हाम्रो कार्यदिशा, सिद्धान्त, लक्ष्य नमिलेसम्म एकता गर्ने छैनौं ।’
