इरानमा एक १७ वर्षीया किशोरीको हत्या गरेका एक व्यक्तिलाई ८ वर्षको जेल सजाय सुनाइएको छ। श्रीमतीको टाउको काटेर उनी सडकमा हिँडेका थिए। अदालतले हत्या गरिएकी युवतीको नाम मोना भएको बताएको छ। उनको परिवारले ज्वाइँलाई क्षमा गरेको छ। त्यसैले उनको सजाय घटाइएको हो।
मोनाको विवाह १२ वर्षको उमेरमा अभियुक्त सज्जाद हैदरीसँग भएको थियो। बिबिसीका अनुसार १४ वर्षको उमेरमा उनका दुई सन्तान भइसकेका थिए। सज्जाद हैदरीले मोनासँग लगातार घरेलु हिंसा गर्ने गर्दथे।
इरानी स्थानीय सञ्चारमाध्यमका अनुसार मोनाले आक्रमणका कारण लगातार सम्बन्धविच्छेदको माग गरिरहेकी थिइन्। जसलाई हैदरीले वेवास्ता गर्थे। यसबाट निराश भएर मोना इरान छोडेर टर्की भागिन्। तर, त्यसको केही दिनपछि परिवारले उनलाई इरान फर्कन बाध्य बनायो। मोनालाई परिवारले केही हुने छैन भनेर आश्वासन दिएका थिए। तर, पतिले उनको हत्या गरेका थिए। एजेन्सी
