१२ फागुन, काठमाडौं
परराष्ट्रमन्त्री डा.विमला राई पौड्यालले विदेशस्थित सबै नेपाली दूतावासका राजदूत र कूटनीतिक नियोग प्रमुखलाई त्यहाँबाट प्रदान गरिने सेवालाई थप प्रभावकारी बनाउन निर्देशन दिएकी छन् ।
परराष्ट्र मन्त्रालयमा शुक्रबार आयोजना गरिएको भर्चुअल बैठकलाई सम्बोधन गर्दै उनले नेपाल बाहिर रहेका नेपालीलाई आइपरेका समस्या तत्काल समाधान गर्न पनि आग्रह गरिन् ।
विश्वमा छरिएर रहेका नेपालीको ज्ञान, सिप र क्षमताको पहिचान गरी आबश्यक पर्दा नेपालको विकासमा सदुपयोग गर्ने वातावारण बनाउन पनि उनले आग्रह गरिन्।
श्रमका लागि विभिन्न देशमा पुगेका नेपाली दाजुभाइ दिदीबहिनीहरुलाई समस्या आइ पर्दा प्रभावकारी सेवा दिन दूतावासहरुमा २४सैं घण्टा सेवा दिने गरी संयन्त्र निर्माण गर्न पनि उहाँले विशेष जोड दिइन्।
नेपालीहरुले मुलुक बाहिर रहँदा कुनै पनि प्रकारका दुःख पाउन नहुने भन्दै परराष्ट्रमन्त्री पौड्यालले उनीहरुलाई आपत् पर्दा तत्काल राहत र उद्घार गर्न कुनै कसर बाँकी नराख्न पनि उहाँहरुलाई निर्देशन दिइन्।
