देवघाट
बिहानी मिडियाले देवघाटको दुईवटा विद्यालयमा अध्ययनरत बालबालिकालाई शैक्षिक सामग्री तथा विद्यालय पोसाक वितरण गरेको छ । संस्थाको वार्षिकोत्सवको अवसर पारेर देवघाट गाउँपालिका वडा नं ४ स्थित जनज्योति आधारभूत विद्यालयका बालबालिकालाई कापी, कलम र पोसाक वितरण गरेको हो ।
विद्यालयमा अध्ययनरत आठ जना विद्यार्थीका लागि कापी, कलम र एकजोर कपडा प्रदान गरिएको बिहानी मिडियाका अध्यक्ष आशिक रानामगरले जानकारी दिए । सोही अवसरमा मिडियाले वर्ष २०८० को भित्तेपात्रोसमेत विमोचन गरेको छ । वडा नं.४ का अध्यक्ष मित्रलाल गुरूङ, वडा नं.५ का अध्यक्ष एवम् देवघाट गाउँपालिकाका प्रवक्ता पूर्णबहादुर कुँवर, विद्यालय व्यवस्थापन समितिका अध्यक्ष नरबहादुर थापामगरलगायतको उपस्थितिमा भित्तेपात्रो विमोचन गरिएको हो ।
यस्तै वडा नं-३ ल्हुङ्ग्रीङस्थित गोरखा कालिका आधारभूत विद्यालयमा अध्ययनरत बालबालिकालाई वडाअध्यक्ष टेकबहादुर आलेमगरमार्फत कापी र कलम वितरण गरिएको छ । विहानी मिडियाले विद्यालयमा अध्ययनरत ४० जना विद्यार्थीलाई कापी र कलम वितरण गर्नुका साथै दुई जना छात्रछात्रालाई भने गरिब तथा जेहेन्दारको आधारमा पोशाक समेत वितरण गरिएको हो ।
