काठमाडौं,
नेपाली कांग्रेसका सभापति शेरबहादुर देउवाले भरतपुर महानगरपालिकाको मेयर पद पुनः माओवादी केन्द्रलाई दिन लागिएको प्रष्ट पारेका छन । चितवन काँग्रेसका सभापति राजेश्वर खनाललाई मंगलवार बालुवाटारमा बोलाएर देउवाले सो कुरो प्रष्ट पारेका हुन । प्रधानमन्त्री समेत रहेका सभापति देउवाको प्रस्ताव चितवन कांग्रेसका राजेश्वर खनालले भने अस्वीकार गरिदिएका छन ।
सो क्रममा देउवाले गठवन्धन जोगाउनका लागि माओवादीलाई भरतपुर महानगरको प्रमुख पद दिनुपर्ने अवस्था आएको भन्दै चितवन जिल्ला समितिले गरेको निर्णय सच्याउन आग्रह गरेका थिए । सभापति देउवाले आग्रह गरे पनि खनालले भनें कार्यकर्ताको भावना विपरीत आफू अघि बढ्न नसक्ने र निर्णय पनि सच्याउन नसक्ने जवाफ दिएका छन ।
‘पार्टी सभापतिले कांग्रेस चितवनको निर्णय सच्याउन आग्रह गर्नुभयो । भरतपुरको मेयर पद पुनः माओवादीलाई दिनुपर्ने भयो, सहयोग गर्नुस् भन्नुभयो । मैले कांग्रेस कार्यकर्ताको भावना अनुसार माओवादीलाई भरतपुरको मेयर दिन नसकिने जानकारी गराए’, खनालले भने ।
खनालले केन्द्रीय समितिको निर्णय राजनीतिक हिसाबले मान्न कर लागे पनि चितवन र भरतपुरको परिस्थिति आफू एक्लैले धान्न नसक्ने जनाएका थिए । ‘पार्टी केन्द्रले निर्णय गर्दा जिल्लाको निर्णय स्वतः खारेज हुन्छ । केन्द्रबाट जेसुकै निर्णय होस तर जिल्लाका कांग्रेस कार्यकर्ताको भावना विपरीत म जान सक्ने अवस्था छैन ’, खनालले देउवालाई भनेका छन् ।
खनालले माओवादी केन्द्रलाई भरतपुरको मेयर पुनः दिने तयारीमा पुनर्विचार गर्नसमेत देउवालाई सल्लाह दिएका छन् । जिल्ला सभापतिले आफ्नो प्रस्ताव अस्वीकार गरेपछि सभापति देउवाले मंगलवार साँझसम्म गठबन्धनले निर्णय लिनै पर्ने अवस्था रहेको सुनाउँदै काठमाडौं , विराटनगर र भरतपुरमध्ये एउटा मेयर माओबादीलाई दिनै पर्ने बाध्यता सुनाएको बताइएको छ ।
सभापति देउवाले साँझसम्म भरतपुरको मेयर पदको उमेदवार माओवादीबाट हुने निर्णय आउने प्रष्ट बताएका छन । सत्ताधारी ५ दलीय गठबन्धनमा भरतपुर महानगरपालिकाको मेयर माओवादीले लिने सहमति बनिसकेको छ । सभापति देउवाले मंगलवार नै कास्की र पर्साका प्रभावशाली नेताहरूसँग पनि छलफल गर्ने कार्यक्रम छ ।
