देवघाट फाल्गुन ८
तनहुँको देवघाट गाउँपालिका वडा नम्बर-२ निवासी गौमाँया थापालाई नेपाली काङ्ग्रेस वन वातावरण तथा जिल्ला विपद शाखाद्वारा ११ हजार ६ सय पच्चीस रूपैयाँ रकम सहयोग हस्तान्तरण गरिएको छ । सो रकम आज(मंगलबार) देवघाट गाउँपालिकाका अध्यक्ष तिल बहादुर थापालाई पालिकामा हस्तान्तरण गरिएको हो ।
बाटोको जटिलताका कारण पीडितको घरसम्म पुग्न नसकेतापनि गाउँपालिका अध्यक्ष मार्फत सकेको रकम सहयोग दिइएको वन वातावरण तथा जिल्ला विपद शाखा संयोजक शिव खत्रीले बताए । त्यस्तै गरि जिल्ला सचिव सहदेव अधिकारीले वन वातावरण तथा जिल्ला विपद शाखाको मुख्य उद्देश्य मानवीय दैविक आपत्तिविपत्तिमा गएर सकेको सहयोग गर्ने रहेकोले देवघाटमा पनि सकेको सहयोग रकम हस्तान्तरण गरिएको बताए ।
रकम ठुलोसानो हैन कि दु:ख बिसाउन सकेको राहत रकम लिएर देवघाट आएको अधिकारीले बताए । अरूको दु:ख लाई आफ्नै दु:ख सम्झेर आर्थिक सहयोग लिएर देवघाट आएकोमा देवघाट गाउँपालिकाका अध्यक्ष तिल बहादुर थापाले धन्यवाद व्यक्त गर्नु भएको थियोे । साथै आपत्तिको बेला कसैले पनि पार्टी नभनि आफुले सक्ने आर्थिक सहयोग गर्न थापाले अनुरोध गर्नु भएको थियोे ।
देवघाट गाउँपालिका २ नं.वडा दुवारगौंडामा गत माघ २२ गते एक घर जलेर नष्ट भएको थियोे । थापाको खरले छाएको दुइताले घरमा आगलागी हुँदा करिब रु.२५ लाख रुपैयाँ बरोबरको धनमाल जलेर नष्ट भएको थियोे । घरमा भएको अन्नपात, लुगाफाटो, गरगहना,भाँडाकुँडा सबै जलेर नष्ट हुँदा गौमाया थापाको परिवार विचल्लीमा परेको घण्टाचुली टोल विकास संस्थाका अध्यक्ष हिरा बहादुर थापाले बताउनु भएको थियोे । थापाको ८ जनाको परिवार रहेको छ ।
