देवघाट बैशाख २१

देवघाट-५ वडाले अनुदानमा कृषकलाई पम्प वितरण गरेका छन् ।

आज शुक्रबार वडा कार्यालयमा देवघाट गाउँपालिकाका प्रवक्ता एवं वडा नम्बर-५ अध्यक्ष पूर्ण बहादुर कुँवर र देवघाट गाउँपालिका कृषि शाखा अधिकृत बिश्वास अम्गाईले कृषकलाई सो पम्प वितरण गरेका हुन् ।

सो पम्प देवघाट गाउँपालिका वडा नं ५ को वार्षिक स्वीकृत कार्यकम अनुसार तरकारी तथा फलफुलमा औषधी छर्ने पम्प खरिद गर्न (५०%) अनुदान कार्यकम बमोजिम पम्प आवश्यक पर्ने कृषकहरुले माग गर्नु भए बमाजिमको पम्प खरिद गरी वितरण गरिएको देवघाट गाउँपालिकाका प्रवक्ता एवं वडा नम्बर-५ अध्यक्ष पूर्ण बहादुर कुँवरले बताउनुभयो । पम्पलाई निवेदक कृषक तथा कृषि फर्महरुले ५०% रकममा (ठूलो पम्पका लागि रु. ६ हजार र सानो पम्पका लागि रु. २ हजार ३ सय ५० ) पर्ने ठुलो पम्प ८ वटा र सानो पम्प २२ वटा गरी जम्मा ३० वटा पम्प वितरण गरिएको समेत अध्यक्ष कुँवरले जानकारी दिनुभयो ।

देवघाट-५ कार्यालयका सचिव पविता खनालले आज वडा कार्यालयमा पम्प बाड्न सुरू गरिएको बताउदैँ पम्प माग गरेका कृषकहरू वडा कार्यालयमा सम्पर्क गर्नु अनुरोध गरेका छन् ।