देवघाट ।
विहानी मिडिया डटकमले महिलाहरूको महान पर्व तीजको अवसरमा मौलिक तीज गीत प्रतियोगिता गर्ने भएको छ ।
दर खाने दिनमा सोमबार देवघाटमा प्रतियोगिता आयोजना गर्न लागेको आइतबार पत्रकार सम्मेलन गरेर जानकारी गराएका हो । अध्यक्ष आशिक रानामगरका अनुसार मौलिक, सामाजिक तथा सांस्कृतिक विषयवस्तुमा केन्द्रित रहेर प्रतियोगिता गर्न लागेको हो । ‘पछिल्लो समय तीज पर्व भड्किलो बन्दै गएकोले त्यसलाई रोक्नको लागि पनि हामीले मौलिक प्रस्तुतिमार्फत प्रतियोगिता आयोजना गर्न लागेका हौँ,’ उनले भने, ‘यसबाट मौलिक संस्कृति संरक्षणमा टेवा पु¥याउन सकिन्छ भन्ने लागेको छ ।’
प्रतियोगितामा राष्ट्रिय लोक तथा दोहोरी गीत प्रतिष्ठान नेपालका संस्थापक अध्यक्ष अमर ‘विरही’ गुरूङ, लोक तथा दोहोरी गायिका चन्द्रा गुरूङ र दोहोरी गायिका भूमिका गिरीले प्रतियोगी समूहको मूल्याङ्कन गर्नेछन् । प्रतियोगितामा सहभागीमध्ये प्रथम हुने समूहलाई नगद रू १० हजार, द्वितीय हुने समूहलाई नगद पाँच हजार र तृतीय हुने समूहलाई नगद रू तीन हजार पुरस्कारको व्यवस्था गरिएको कार्यक्रम संयोजक अनिल मिश्रले जानकारी दिए ।
यसका साथै चर्चित गायक बलबिक्रम थापामगर, रञ्जिता थापामगर, सुवास तिम्सिना, सञ्जय थापामगर, अञ्जु खड्का र शिव थापामगरले गायन प्रस्तुत गर्नेछन् । यस्तै वृन्दा दाहाल र कविता आलेमगरले नृत्य प्रस्तुत गर्नेछन् भने सागर गाहामगरले हाँस्य व्यङ्ग्य प्रस्तुत गर्नेछन् ।
एसइइ परीक्षामा उत्कृष्ट अंक ल्याउने विद्यार्थीलाई सम्मान देवघाट गाउँपालिकाभित्र रहेर २०७८ सालमा भएको एसइइ परीक्षामा सर्वोत्कृष्ट अंक ल्याउन सफल तीन जना विद्यार्थीलाई पनि सम्मान गर्ने कार्यक्रम रहेको विहानी मिडियाले जनाएको छ । अध्यक्ष आशिक रानामगरका अनुसार सामुदायिक विद्यालयतर्फ बज्रयोगिनी मावि देवघाट–५ का सबिना मगर (३.२५) र पार्वती मावि देवघाट–१ का किरण गुरूङ (३.१) तथा गुरूकूलतर्फ महेश संस्कृत गुरूकुलम्का दिग्विजय लामिछाने (३.९५) लाई सम्मान गर्न लागेको हो ।
